Arend is die talentvolle kunstenaar, Boshoff Arendse, se nuutste enkelsnit en simboliseer vryheid, selfontdekking en die soeke na jou plek in die wêreld.
Aanhangers wat waardering het vir eerlike lirieke, diep emosie en moderne klanke met betekenis, gaan vinnig aanklank vind by dié inspirerende pop-rock-snit.
Die liedjie is geskryf deur Janco Dreyer (soos die sanger voorheen bekend was) en Eugene Nel, wat die emosionele reis van identiteit, anders wees en grootword op ’n besonderse manier vasgevang het.
Boshoff en Eulen Records het saam aan die produksie gewerk om die rou emosie en unieke klank van die liedjie perfek oor te dra.
Die inspirasie vir die liedjie het uit persoonlike emosies en vrae ontstaan waarmee hy self oor sy menswees en inpas geworstel het. Die enkelsnit dien as ’n herinnering dat dit aanvaarbaar is om anders te wees en jou eie pad in die lewe te vind.
“Arend gaan oor identiteit, ‘anders’ voel, grootword en om uiteindelik die realiteit van wat die lewe regtig is, te aanvaar,” vertel hy oor die betekenis agter die lirieke.
“Dit is waarskynlik die eerlikste weergawe van myself wat ek nog ooit in ’n liedjie vasgevang het.”
Volgens Boshoff hoop hy dat luisteraars met die liedjie sal vereenselwig omdat die emosies en boodskap universeel en eg is aan menslike ondervinding.
Arend is Boshoff se vyfde enkelsnit. Sy vorige vrystellings het goeie radiospeeltyd ontvang en baie positiewe terugvoer gekry.
Met hierdie vrystelling begin hy ook ’n splinternuwe hoofstuk in sy loopbaan onder sy nuwe kunstenaarsnaam, Boshoff Arendse.
Hy hoop dat hierdie nuwe era nog meer mense sal bereik en aanhangers sal inspireer om sy oorspronklike musiek te ontdek.
Die musiekvideo vertel ’n eenvoudige, maar treffende storie van alleen wees, selfontdekking en die soeke na identiteit.
In die video bevind hy homself alleen tussen velde en bome, terwyl die natuurlike omgewing die rou emosie van die lied versterk.
Die konsep van die video is geïnspireer deur die boodskap van die lied self – om soos ’n arend bo alles te probeer uitstyg, maar steeds te worstel met identiteit, realiteit en menswees.
“Ek het besluit om dit minimalisties te hou sodat die emosie en betekenis van die liedjie die hoofrol kan speel,” vertel hy oor die produksie.
Die video is geskiet by The Red Barn in Centurion. Die natuurlike omgewing skep ’n oop en rou landskap wat perfek by die lied pas.
Gerduan Kemp Productions het die produksie behartig, met die ondersteuning van sy Musiek Label / Ferdi Steyn, van Artist Village.
Volgens die kunstenaar was die opname van die video ’n baie persoonlike ervaring. Omdat hy alleen in die video verskyn, is dit soos ’n visuele weerspieëling van die emosies en gedagtes wat hy diep binne hom gevoel het.
Die 26-jarige sanger is gebore en het grootgeword in Bloemfontein, waar hy sy skoolloopbaan by Grey College voltooi het. Hy studeer tans Computer Aided Drawing by CTU in Bloemfontein.
Na skool het hy ses jaar lank probeer om sy naam in die musiekbedryf te vestig. Musiek was nog altyd deel van sy lewe en hy sing reeds van 11-jarige ouderdom af. Hy is al ongeveer 15 jaar betrokke in die musiekbedryf.
Boshoff is ongetroud, maar hy het ’n spesiale persoon in sy lewe. Hy is ook ’n familiemens wat baie waarde heg aan verhoudings.
Deur sy loopbaan was hy al betrokke by verskeie verhoogproduksies, talentkompetisies, feesoptredes en radio-vrystellings.
Van die grootste hoogtepunte in sy loopbaan sover was die vrystellings van sy vorige vier enkelsnitte op radio.
“Ek droom daarvan om voor my dertigste verjaardag ’n stadion vol mense met my musiek te bereik,” verklap die sanger oor wat hy graag wil bereik.
“Buiten dit en my liefde vir musiek geniet ek dit ook om stories op die verhoog te vertel.”
Sy musiekstyl word sterk beïnvloed deur pop, rock en Afrikaanse musiek. Internasionale kunstenaars soos Billie Eilish, asook plaaslike kunstenaars soos Elvis Blue, het ’n invloed op sy eie styl gehad.
Volgens die musikant inspireer eerlike stories hom die meeste en sal hy graag in die toekoms met kunstenaars wil werk wat nie bang is om hulself deur musiek uit te druk nie.
As hy nie ’n loopbaan in musiek gehad het nie, sou hy waarskynlik iets kreatief soos ontwerp of argitektuur gekies het omdat hy daarvan hou om visuele idees te skep.
“Ek dink baie diep oor die lewe en mense,” sê hy wanneer hy gevra word wat ander dalk nie van hom weet nie.
Die vermaaklikheidsbedryf het hom al geleer om altyd homself te wees en nie te probeer wees wat ander wil hê hy moet wees nie.
Buiten musiek fokus hy tans op sy studies en persoonlike groei.
Volgens Boshoff was die grootste uitdaging in sy lewe om sy plek en identiteit as mens te vind.
Hy beskryf sy musiek as eerlike emosie met moderne klanke en diep betekenis.
Sy planne vir die res van 2026 sluit die vrystelling van meer oorspronklike musiek in, om as kunstenaar te groei en om nog meer mense met sy musiek te bereik.
Arend beloof om diep gevoelens by luisteraars aan te wakker en mense daaraan te herinner dat dit heeltemal oukei is om anders te wees en jou eie pad te stap.
Die snit is nou beskikbaar op alle stromingsplatforms. Kry dit hier: https://ffm.to/boshoff-arendse-arend
Die musiekvideo is nou beskikbaar op YouTube. Kry dit hier: https://youtu.be/YYjWOgq8Duw?si=L2KhcAlZhSoLb8ZS
Laai die video hier af in hoë resolusie formaat: Kry dit hier: https://drive.google.com/file/d/1ldHGV8_jfIRtK2PviQkiAecinW1H3D_O/view?usp=sharing
Skrywers: Janco Dryer / Eugene Nel
Verwerker: Eugene Nel / Eulen Records
Label: Artist Village
ISRC Kode: ZBZ422600002
VOLG HOM OP SOSIALE MEDIA:
Facebook – https://www.facebook.com/share/14jbomDNqjQ/
Instagram – https://www.instagram.com/boshoff_arendse?igsh=MW1veTk2dGIwYTh2NQ==
TikTok – https://www.tiktok.com/@boshoff_arendse?_r=1&_t=ZS-96XzyvoABF9 YouTube – https://youtube.com/@boshoffarendse?si=uxnNYm3c2rnKYtDM
